تمنشير ليكس (Produit algérien imitation en Amérique)

||~~°°تحيـــــة من keltoum الى أعضـــاء حلم العمر°°~~||


السلامـ عليكمـ و رحمة الله
--بصراحة اثارني هالموضوع وهو حقيقة عندنا مي مش اعلامي بالدرجة الاولى

كل مرة نلقاو الاعلام يركز على موضوع معين و كل ما تبدل القناة تلقاهم يهدرو على نفس الموضوع، فمن محاكمة تاع الشهيد صدام الى انفلونزا الطيور الى انفلونزا الخنازير و قريبا على شاشات التلفزيون مسلسل "انفلونزا الأحصنة"، كل يوم نلقاهم يهدرو على موضوع و يعطولو أكثر من أهميتو و بعد شهور تلقاهم نساو هذاك الموضوع لي كانو يهدرو عليه خلاص.

يمكن تقول اعلام موجه و مدايرنلو اشارة من اشارات المرور تاع طريق ذو اتجاه واحد، راهي بدات في الآونة الأخيرة هذي البدعة تاع ويكيليكس، عمك الفحل دار شوي بيراطاج على المؤسسات العسكرية و شوي معريفة و بدا يخرج في الحاشي و الراشي.

ما علابالوش بلي هذا النوع من المواقع بداو في الجزائر منذ وقت لكن للأسف ماكاش تغطية اعلامية، فهناك مواقع جزائرية'وهدي حقيقة ماتخفى على حتى واحد راهم يكشفو منذ مدة في الأسرار و الغسيل تاع الجزائر، قبل هذي ويكيليكس، فأحد المواقع اللي سرب بعض الوثائق تاع سوناطراك كان أهم العوامل اللي خلات عمنا شكيب خليل يستقيل،، آه غلطت يستدعى لمهام أخرى.

بلا ما نهدرو الرياضة لي رانا ماديين فيها ميدالية الذهبية "قالي قتلك" "راني سمعت" زيدلها الصحافة الصفراء تاعنا و راديو تروطوار، كل هذا يشكل مع بعضهم قوة أكبر من ويكيليكس.

حنا في بلادنا نسمعو في المرشي بالتعديلات الوزارية قبل ما يسمعها النواب في أروقة البرلمان.

صافي العقلية الجزائرية في غنى عن ويكيليكس، لأنه تقدر تركب مع كلونديستان يقولك بالتفصيل وش هدر بوتفليقة مع زين العابدين بن علي، و تبقى المصادر كيما يقولك لا يرقى اليها شك.

"ولد عمي تلاقا مع صاحبو ، قالو بلي مرت خوه قاتلو بلي صاحبتها سمعت واحد يهدر على زيادة في الأجور"
هذا هو ويكيليكس تاعنا تمنشير ليكس



تحيـــــاتي